ಪಶ್ಚಿಮ ಮತ್ತು ಕನ್ನಡ ಸಾಹಿತ್ಯ ಸಂದರ್ಭದ ಭಾಷಾಂತರ ಪ್ರಕ್ರಿಯೆಗಳು

Abstract

ಪಾಶ್ಚಾತ್ಯ ಮತ್ತು ಕನ್ನಡ ಸಾಹಿತ್ಯದ ಹಿನ್ನೆಲೆಯಲ್ಲಿ ಭಾಷಾಂತರ ಪ್ರಕ್ರಿಯೆಯ ತಾತ್ವಿಕ ಹಾಗೂ ಪ್ರಾಯೋಗಿಕ ಆಯಾಮಗಳನ್ನು ಇಲ್ಲಿ ಸಮಗ್ರವಾಗಿ ವಿಶ್ಲೇಷಿಸಲಾಗಿದೆ. ಭಾಷಾಂತರವೆಂದರೆ ಕೇವಲ ಯಥಾವತ್ ಶಬ್ದಾನುವಾದವಲ್ಲ; ಅದೊಂದು ಸೃಜನಶೀಲ, ಸಾಂಸ್ಕೃತಿಕ ಹಾಗೂ ಮರುಸೃಷ್ಟಿಯ ಕ್ರಿಯೆ ಎಂಬುದನ್ನು ಎಂಟು ಭಿನ್ನ ಮಾದರಿಗಳ ಮೂಲಕ ಚರ್ಚಿಸಲಾಗಿದೆ. ಕ್ಷಣ ಭಾಷಾಂತರ, ಅಣಕ (ಮಿಮಿಕ್ರಿ), ಮೌಖಿಕ ಸಾಹಿತ್ಯದ ಲಿಪೀಕರಣ, ಯಂತ್ರಾನುವಾದ, ವಾಪಸಾತಿ ಭಾಷಾಂತರ, ರಫ್ತು ಅಥವಾ ವಿಲೋಮ ಭಾಷಾಂತರ, ಗುಂಪು ಭಾಷಾಂತರ ಮತ್ತು ಸಂಕ್ಷೇಪೀಕರಣಗಳೆಂಬ ವಿಶಿಷ್ಟ ವಿಧಾನಗಳನ್ನು ಉದಾಹರಣೆಗಳ ಸಹಿತ ವಿವರಿಸಲಾಗಿದೆ. ಬಿ.ಎಂ.ಶ್ರೀ, ಎ.ಕೆ. ರಾಮಾನುಜನ್ ಅವರ ಪ್ರಯೋಗಗಳು ಹಾಗೂ ಪಂಪ, ರನ್ನರ ಕಾವ್ಯಗಳ ಸಿಂಹಾವಲೋಕನ ಕ್ರಮಗಳನ್ನು ಆಧರಿಸಿ, ಭಾಷಾಂತರವು ಕೇವಲ ನಕಲಾಗಿರದೆ ಸಾಹಿತ್ಯಕ ಸಂವೇದನೆ, ಸಾಂಸ್ಕೃತಿಕ ಮುಖಾಮುಖಿ ಹಾಗೂ ಪ್ರತಿಪಠ್ಯ ನಿರ್ಮಾಣದ ಪ್ರಬಲ ಸಾಧನವಾಗಿ ಹೇಗೆ ಕಾರ್ಯನಿರ್ವಹಿಸುತ್ತದೆ ಎಂಬುದನ್ನು ಈ ಲೇಖನದಲ್ಲಿ ಸೈದ್ಧಾಂತಿಕವಾಗಿ ಕಟ್ಟಿಕೊಡಲಾಗಿದೆ.