ಹಿಂದೂ ಕೋಡ್‌ ಬಿಲ್‌: ಡಾ.ಬಿ.ಆರ್. ಅಂಬೇಡ್ಕರ್‌ & ಸಾಮಾಜಿಕ ನ್ಯಾಯ

Abstract

ಸ್ವಾತಂತ್ರ್ಯ ನಂತರದ ಭಾರತದಲ್ಲಿ ಹಿಂದೂ ವೈಯಕ್ತಿಕ ಕಾನೂನನ್ನು ಸುಧಾರಿಸಲು ಮತ್ತು ಅದನ್ನು ಲಿಂಗ ಭೇದವಿಲ್ಲದೆ ಏಕೀಕರಿಸಲು ಮಾಡಿದ ಅತ್ಯಂತ ಮಹತ್ವದ ಶಾಸಕಾಂಗ ಪ್ರಯತ್ನಗಳಲ್ಲಿ ಒಂದಾಗಿದೆ, ಅದರಲ್ಲೂ ಪ್ರಮುಖವಾಗಿ ಸಮಾನತೆಯ ಹರಿಕಾರರೆಂದೇ ಪ್ರಸಿದ್ಧರಾದ ಡಾ. ಬಿ. ಆರ್. ಅಂಬೇಡ್ಕರ್ ಅವರ ಪಾತ್ರ ಹಿಂದೂ ಕೋಡ್‌ ಬಿಲ್ ಜಾರಿಯಲ್ಲಿ ಐತಿಹಾಸಿಕವಾದದ್ದು. ಭಾರತದ ಮೊದಲ ಕಾನೂನು ಸಚಿವರಾಗಿ ಅಧಿಕಾರ ಸ್ವೀಕರಿಸಿದ ಡಾ. ಬಾಬಾಸಾಹೇಬ್ ಅಂಬೇಡ್ಕರ್ ಅವರು ಪಿತೃಪ್ರಭುತ್ವದ ಸಾಮಾಜಿಕ ರಚನೆಯನ್ನು ಕೆಡವಲು ಮತ್ತು ಮಹಿಳೆಯರಿಗೂ ಸಹ ಪುರುಷ ಸಮಾನ ಸ್ಥಾನಮಾನ ಕಲ್ಪಿಸಲು ಮಾಡಿದ ಪ್ರಯತ್ನ ಅವಿಸ್ಮರಣೀಯವಾದದ್ದು. ಮಸೂದೆಯು ಪ್ರಮುಖವಾಗಿ ವೈವಿಧ್ಯಮಯವಾಗಿದ್ದ ಹಿಂದೂ ಕಾನೂನುಗಳನ್ನು ಒಂದೇ ಸ್ಪಷ್ಟ ಮತ್ತು ಸಮಾನ ಸಂಹಿತೆಯಾಗಿ ಕ್ರೋಢೀಕರಿಸುವ ಗುರಿಯನ್ನು ಹೊಂದಿತ್ತು ಹಾಗೂ ಅದನ್ನು ಡಾ. ಬಿ. ಆರ್. ಅಂಬೇಡ್ಕರ್ ಅವರು “ಮಹಿಳೆಯರ ಹಕ್ಕುಗಳ ಚಾರ್ಟರ್” ಎಂದೇ ಪರಿಗಣಿಸಿದರು. ಇದರಲ್ಲಿ ಅವರು ಹೆಣ್ಣುಮಕ್ಕಳಿಗೆ ಸಮಾನ ಆಸ್ತಿ, ಅನುವಂಶೀಯತೆ, ಮದುವೆಯಲ್ಲಿ ಜಾತಿ ಅಡೆತಡೆಗಳನ್ನು ನಿರ್ಮೂಲನೆ ಮಾಡುವುದು ಮತ್ತು ವಿಚ್ಛೇದನಕ್ಕೆ ಕಾನೂನುಬದ್ಧ ಹಕ್ಕು ಮುಂತಾದ ಕ್ರಾಂತಿಕಾರಿ ಬದಲಾವಣೆಗಳನ್ನು ಪರಿಚಯಿಸಿದರು; ಆದ್ದರಿಂದ ಈ ಗ್ರಂಥದಲ್ಲಿ ಮಸೂದೆ ಮತ್ತು ಅಂಬೇಡ್ಕರ್ ಅವರ ಪಾತ್ರವನ್ನು ಸುತ್ತುವರೆದಿರುವ ಐತಿಹಾಸಿಕ ವಿಶ್ಲೇಷಣೆಯನ್ನು ನೀಡಲಾಗಿದೆ.