ಕನ್ನಡ ರಂಗಭೂಮಿಗೆ - ರಸಋಷಿ ಕುವೆಂಪುರವರ ಕೊಡುಗೆ

Abstract

ರಾಷ್ಟ್ರಕವಿ ಕುವೆಂಪು ಅವರು ರಂಗಭೂಮಿಯನ್ನು ಕೇವಲ ಮನರಂಜನಾ ಮಾಧ್ಯಮವಾಗಿ ನೋಡದೆ, ಸಮಾಜ ಸುಧಾರಣೆ ಹಾಗೂ ಮೌಲ್ಯವರ್ಧನೆಯ ಪ್ರಬಲ ಅಸ್ತ್ರವಾಗಿ ರೂಪಿಸಿದರು. ಪಾರ್ಸಿ ನಾಟಕಗಳ ಪ್ರಭಾವವಿದ್ದ ಕಾಲಘಟ್ಟದಲ್ಲಿ ‘ನಾಡ ನಾಟಕ’ ಪರಿಕಲ್ಪನೆಯನ್ನು ಹುಟ್ಟುಹಾಕಿ, ಯಕ್ಷಗಾನ ಮತ್ತು ಬಯಲಾಟದಂತಹ ದೇಶೀಯ ಕಲೆಗಳನ್ನು ಆಧುನಿಕ ರಂಗಭೂಮಿಯೊಂದಿಗೆ ಯಶಸ್ವಿಯಾಗಿ ಬೆಸೆಯುವ ಕಾರ್ಯ ಮಾಡಿದರು. ‘ಶೂದ್ರ ತಪಸ್ವಿ’, ‘ಜಲಗಾರ’, ‘ಸ್ಮಶಾನ ಕುರುಕ್ಷೇತ್ರ’ ಮುಂತಾದ ಗಂಭೀರ ನಾಟಕಗಳ ಮೂಲಕ ಜಾತಿ ವ್ಯವಸ್ಥೆ, ಮೂಢನಂಬಿಕೆ ಹಾಗೂ ಯುದ್ಧದ ನಿರರ್ಥಕತೆಯನ್ನು ತಾರ್ಕಿಕವಾಗಿ ಪ್ರಶ್ನಿಸಿದರು. ಕಾವ್ಯಾತ್ಮಕ ಭಾಷೆ, ಕನಿಷ್ಠ ರಂಗಸಜ್ಜಿಕೆ ಹಾಗೂ ವಿನೂತನ ತಂತ್ರಗಾರಿಕೆಗಳ ಮೂಲಕ ರಂಗಪ್ರಯೋಗಗಳಿಗೆ ಹೊಸ ಆಯಾಮ ನೀಡಿದರು. ಪೌರಾಣಿಕ ಕಥೆಗಳಿಗೆ ಆಧುನಿಕ ಹಾಗೂ ಮಾನವೀಯ ಸ್ಪರ್ಶ ನೀಡಿ, ‘ವಿಶ್ವಮಾನವ’ ತತ್ವವನ್ನು ವೇದಿಕೆಯ ಮೂಲಕ ಸಾರಿದ ಅವರ ರಂಗಚಿಂತನೆಯು ಇಂದಿನ ಪ್ರಾಯೋಗಿಕ ಕನ್ನಡ ರಂಗಭೂಮಿಗೆ ಸಾರ್ವಕಾಲಿಕ ಸ್ಫೂರ್ತಿಯಾಗಿದೆ.