ಜ್ಞಾನಬೋಧೆಯ ವಿನೂತನ ಪ್ರಯೋಗ - ಪಂಚತಂತ್ರ

Abstract

ಭಾರತೀಯ ಕಥಾಸಾಹಿತ್ಯದಲ್ಲಿ ‘ಪಂಚತಂತ್ರ’ವು ಜ್ಞಾನಬೋಧೆಯ ಅತ್ಯಂತ ವಿಶಿಷ್ಟ ಹಾಗೂ ವಿನೂತನ ಪ್ರಯೋಗವಾಗಿದೆ. ಪ್ರಾಚೀನ ಕಾಲದ ಮೌಖಿಕ ಕಥನ ಪರಂಪರೆಯಿಂದ ಬೆಳೆದುಬಂದ ಈ ಕೃತಿಯು, ನೀತಿಶಾಸ್ತ್ರ ಮತ್ತು ಬದುಕಿನ ಮೌಲ್ಯಗಳನ್ನು ಪ್ರಾಣಿ-ಪಕ್ಷಿಗಳ ಪಾತ್ರಗಳ ಮೂಲಕ ಅತ್ಯಂತ ಕಲಾತ್ಮಕವಾಗಿ ಕಟ್ಟಿಕೊಡುತ್ತದೆ. ವಿಷ್ಣುಶರ್ಮ ಹಾಗೂ ವಸುಭಾಗಭಟ್ಟರ ಮೂಲ ಪ್ರೇರಣೆಯಿಂದ ಮೂಡಿಬಂದ ಈ ಕಥಾಗುಚ್ಛವನ್ನು ದುರ್ಗಸಿಂಹನು ಕನ್ನಡಕ್ಕೆ ತರುವ ಮೂಲಕ ಅದರ ಜಾಗತಿಕ ಮತ್ತು ಪ್ರಾದೇಶಿಕ ಮಹತ್ವವನ್ನು ವಿಸ್ತರಿಸಿದ್ದಾನೆ.
ಕಥೆಯೊಳಗೊಂದು ಕಥೆ ಎಂಬ ವಿಶಿಷ್ಟ ನಿರೂಪಣಾ ತಂತ್ರವನ್ನು ಹೊಂದಿರುವ ಪಂಚತಂತ್ರವು ಕೇವಲ ಮನರಂಜನೆಯಲ್ಲದೆ, ಮಾನವನ ಸ್ವಭಾವ, ವರ್ತನೆ, ಧರ್ಮಮಾರ್ಗ ಮತ್ತು ಸಮಸ್ಯೆಗಳಿಗೆ ಪರಿಹಾರಗಳನ್ನು ಒದಗಿಸುವ ಮಾರ್ಗದರ್ಶಿಯಾಗಿದೆ. ಆದರ್ಶ ಜೀವನದ ಮೌಲ್ಯಗಳನ್ನು ಜನಸಾಮಾನ್ಯರಿಗೆ ಮತ್ತು ರಾಜಕುಮಾರರಿಗೆ ತಿಳಿಹಾಸ್ಯ ಹಾಗೂ ಸೂಕ್ಷ್ಮ ವ್ಯಂಗ್ಯದ ಮೂಲಕ ತಲುಪಿಸುವಲ್ಲಿ ಈ ನೀತಿಕಥೆಗಳ ಪಾತ್ರ ಅನನ್ಯವಾಗಿದೆ.