ದೊಡ್ಡಪಾಲನಹಳ್ಳಿ ಇತಿಹಾಸ ಮತ್ತು ಐತಿಹ್ಯ: ಸಂಬಂಧಗಳ ಅಧ್ಯಯನ

Abstract

ಇತಿಹಾಸ ಮತ್ತು ಐತಿಹ್ಯಗಳ ನಡುವಿನ ಸಂಬಂಧವನ್ನು ದೊಡ್ಡಪಾಲನಹಳ್ಳಿಯ ಸಾಂಸ್ಕೃತಿಕ ಹಾಗೂ ಭೌತಿಕ ಕುರುಹುಗಳ ಹಿನ್ನೆಲೆಯಲ್ಲಿ ವಿಶ್ಲೇಷಿಸುವ ಪ್ರಯತ್ನವಿದು. ವಿಜಯನಗರ ಸಾಮ್ರಾಜ್ಯದ ಪೂರ್ವದ ಐತಿಹಾಸಿಕ ವ್ಯಕ್ತಿ ‘ಗಂಡುಗಲಿ ಕುಮಾರರಾಮ’ ದೂರದ ಹಳ್ಳಿಯಲ್ಲಿ ಜಾನಪದ ದೈವವಾಗಿ ನೆಲೆಸಿರುವ ವಿಸ್ಮಯ, ಆತನ ದೇವಾಲಯದ ಸ್ಥಾಪನೆಯ ಹಿಂದಿರುವ ಮೌಖಿಕ ಕಥನಗಳು ಹಾಗೂ ನಂಬಿಕೆಗಳನ್ನು ಇಲ್ಲಿ ಕಟ್ಟಿಕೊಡಲಾಗಿದೆ. ಅಲ್ಲದೆ, ಗ್ರಾಮದ ‘ತೋಳಗೈಯಮ್ಮನ ಗುಡಿ’ಯ (ಮಾಸ್ತಿಕಲ್ಲು) ಹಿನ್ನೆಲೆಯಲ್ಲಿ ಪಾಲನಾಯಕ ಹಾಗೂ ವಲಸೆ ಬಂದ ಕುಟುಂಬದ ಜಕ್ಕನಾಯಕನ ನಡುವೆ ನಡೆದ ಕದನದ ರೋಚಕ ಐತಿಹ್ಯವನ್ನು ತೆರೆದಿಡಲಾಗಿದೆ. ಗ್ರಾಮದಲ್ಲಿ ದೊರೆತಿರುವ, ಬುಕ್ಕರಾಯನ ಉಲ್ಲೇಖವಿರುವ ಕ್ರಿ.ಶ. 1343ರ ವೀರಗಲ್ಲು ಶಾಸನದಲ್ಲಿನ ಅಂಶಗಳನ್ನು ಸ್ಥಳೀಯ ಐತಿಹ್ಯಗಳೊಂದಿಗೆ ಮುಖಾಮುಖಿಯಾಗಿಸಿ, ಇತಿಹಾಸದ ಪುಟಗಳಲ್ಲಿ ಮರೆಯಾಗಿರುವ ಸತ್ಯಗಳನ್ನು ಶೋಧಿಸುವ ತಾತ್ವಿಕ ಚಿಂತನೆಯನ್ನು ಮಂಡಿಸಲಾಗಿದೆ. ಶಾಸನಗಳು ಹಾಗೂ ಮೌಖಿಕ ಪರಂಪರೆಯ ಕೊಂಡಿಗಳನ್ನು ಬೆಸೆಯುವ ಮೂಲಕ ಸ್ಥಳೀಯ ಚರಿತ್ರೆಯ ಮರುನಿರ್ಮಾಣಕ್ಕೆ ಇಲ್ಲಿ ಒತ್ತು ನೀಡಲಾಗಿದೆ.