ಸಾಮಾನ್ಯರ ಬದುಕಿನಲ್ಲಿ ಎಮ್ಮೆ

Abstract

ಮಾನವನ ನಾಗರಿಕತೆಯ ಬೆಳವಣಿಗೆಯಲ್ಲಿ ಮತ್ತು ಕೃಷಿ ಪ್ರಧಾನವಾದ ದ್ರಾವಿಡ ಸಂಸ್ಕೃತಿಯಲ್ಲಿ 'ಎಮ್ಮೆ'ಯ ಪಾತ್ರವು ಅತ್ಯಂತ ಮಹತ್ವದ್ದಾಗಿದೆ. ಹರಪ್ಪ ಸಂಸ್ಕೃತಿಯ 'ದ್ರವಿಡಿಯನ್ ಬುಲ್' ನಿಂದ ಹಿಡಿದು ಸಂಗಂ ಸಾಹಿತ್ಯ ಮತ್ತು ಕನ್ನಡ ಜಾನಪದ ಗೀತೆಗಳವರೆಗೆ ಎಮ್ಮೆಯ ಉಲ್ಲೇಖಗಳು ಹೇರಳವಾಗಿ ಕಂಡುಬರುತ್ತವೆ. ಕಪ್ಪು ಬಣ್ಣದ ಎಮ್ಮೆಯು ಕೇವಲ ಹಾಲು ಕೊಡುವ ಪ್ರಾಣಿಯಾಗಿರದೆ, ದಕ್ಷಿಣ ಭಾರತದ ಒಕ್ಕಲುತನದ ಬೆನ್ನೆಲುಬಾಗಿದೆ. ಆದರೆ ಇತ್ತೀಚಿನ ದಿನಗಳಲ್ಲಿ ಗೋವಿನ ವೈಭವೀಕರಣದಿಂದಾಗಿ, ಮೂಲನಿವಾಸಿಗಳ ಬದುಕಿನ ಭಾಗವಾಗಿದ್ದ ಎಮ್ಮೆಯು ಕಡೆಗಣಿಸಲ್ಪಡುತ್ತಿದೆ. ಎಮ್ಮೆಯ ಹಾಲು, ಚರ್ಮ ಮತ್ತು ಗೊಬ್ಬರಗಳು ಗ್ರಾಮೀಣ ಆರ್ಥಿಕತೆಯಲ್ಲಿ ವಹಿಸುವ ಪಾತ್ರ ಮತ್ತು ಸಾಹಿತ್ಯದಲ್ಲಿ ಅದರ ಕುರಿತಾದ ವರ್ಣನೆಗಳನ್ನು ಈ ಲೇಖನವು ಚರ್ಚಿಸುತ್ತದೆ. ಆಹಾರ ರಾಜಕೀಯ ಮತ್ತು ಸಾಂಸ್ಕೃತಿಕ ಮೇಲಾಟಗಳ ನಡುವೆ ಎಮ್ಮೆಯ ಐತಿಹಾಸಿಕ ಮತ್ತು ಪ್ರಾಯೋಗಿಕ ಮಹತ್ವವನ್ನು ಮರುಸ್ಥಾಪಿಸುವ ಅಗತ್ಯವನ್ನು ಲೇಖಕರು ಪ್ರತಿಪಾದಿಸಿದ್ದಾರೆ.