തെയ്യം പുരാവൃത്തവും മലയാള ചെറുകഥയും

Abstract

നാടോടി കലാരൂപങ്ങളെ ഇതിവൃത്തഘടനയോട് ചേർത്ത്, ലിഖിതസാഹിത്യത്തിന്റെ പ്രമേയത്തെതന്നെ പൊലിപ്പിക്കും വിധം സന്നിവേശിപ്പിക്കുന്നത് ആധുനികതയുടെ ആരംഭംമുതൽ കാണുവാൻ സാധിക്കും. മലയാളത്തിലെ ഫോ‌ക്ലോർ പാരമ്പര്യത്തിൽ സവിശേഷസ്ഥാനമാണ് ഉത്തരമലബാറിലെ തെയ്യമെന്ന അനുഷ്‌ഠാന കലാരൂപത്തിനുള്ളത്. ഉരവം കൊണ്ടകാലത്തെ സാമൂഹിക ജീവിതത്തിന്റെ സൂക്ഷ്‌മാംശങ്ങളെ നിലനിർത്തുന്നതോടൊപ്പം നിരാകരിച്ചും സ്വാംശീകരിച്ചുമാണ് തെയ്യവും നിലകൊണ്ടിട്ടുള്ളത്. തെയ്യത്തെ ഉപജീവിച്ച മലയാള കഥാപരിസരം എത്രമാത്രം ഊർജ്ജമാവാഹിച്ചു എന്ന് പഠിക്കുകയാണ് ഈ പ്രബന്ധത്തിലൂടെ. മനുഷ്യജീവിതത്തിലെ അത്യന്തം ഹ്രസ്വവും ദീർഘവുമായ പ്രതിസന്ധികൾക്ക് പരിഹാരം തേടുന്ന വിരേചനമാർഗമാണ് ഫോക്ലോർ കലകളും അതിനെ ആശ്രയിച്ചുള്ള കഥപറച്ചിലും. തെയ്യത്തെ പ്രധാന പ്രമേയമാക്കിക്കൊണ്ട് നോവലുകളും ചെറുകഥാരൂപങ്ങളും മലയാളത്തിൽ ഏറെ ഉണ്ടായിട്ടുണ്ട്.