ಕುಂದಗನ್ನಡ ಜನಪದ ಗಾದೆಗಳಲ್ಲಿ ಸ್ತ್ರೀ ಅಭಿವ್ಯಕ್ತಿ

Abstract

ಗಾದೆ ನಿತ್ಯ ಬದುಕಿನೊಂದಿಗೆ ಒಡ ಬೆರೆತಿರುವ ಜನಪದ ಪ್ರಕಾರವಾಗಿದ್ದು, ಮಾತಿನ ಅವಿಭಾಜ್ಯ ಅಂಗವಾಗಿ ಬಳಕೆಯಾಗುತ್ತದೆ. ಸಂಸ್ಕೃತಿಯೊಂದರ ಸಾಮಾಜಿಕ ನಿಯಮಗಳು, ಸಾಂಸ್ಕೃತಿಕ ನಂಬಿಕೆಗಳು, ಮಾನವ ಬದುಕಿನ ನಿರೀಕ್ಷೆಗಳು ಗಾದೆಗಳಲ್ಲಿ ಪ್ರತಿಬಿಂಬಿತಗೊಳ್ಳುತ್ತವೆ. ಇಂತಹ ನಂಬಿಕೆ-ನಡವಳಿಕೆಗಳನ್ನು ಕಾಯ್ದುಗೊಳ್ಳುವಲ್ಲಿ ಸಂವಹನವನ್ನು ಮನದಟ್ಟಾಗಿಸಿ ಅರ್ಥವನ್ನು ಮೊನಚುಗೊಳಿಸುವ ಉದ್ದೇಶವನ್ನು ಗಾದೆಯೊಂದು ಹೊಂದಿರುತ್ತದೆ. ಅವು ರೂಪಕ, ಪ್ರತಿಮೆ, ಸಂಕೇತಗಳ ಮೂಲಕ ಪ್ರಕಟಗೊಳ್ಳುತ್ತದೆ. ಒಂದು ಗಾದೆಯನ್ನು ನಾವು ಬಳಸುತ್ತೇವೆಂದರೆ ಆ ಗಾದೆ ಪ್ರಕಟಿಸುವ ಸಾಂಸ್ಕೃತಿಕಮೌಲ್ಯಗಳನ್ನು ನಾವು ಅಂತರ್ಗತಗೊಳಿಸಿಕೊಂಡಿದ್ದೇವೆ ಎಂದರ್ಥ. ಈ ನೆಲೆಯಲ್ಲಿ ಸಂಸ್ಕೃತಿ ಅಥವಾ ಸಮುದಾಯವೊಂದರ ಮೌಲ್ಯಗಳ ಸೃಷ್ಟಿ ಹಾಗೂ ವಾಹಕವಾಗಿ ಆಕರಗಳಾಗಿ ನಿಲ್ಲುತ್ತವೆ. ಪುರುಷ ಪ್ರಧಾನವಾದ ಸಂಸ್ಕೃತಿಯೊಂದರಲ್ಲಿ ಗಾದೆಗಳ ಉತ್ಪಾದಕರು ಪುರುಷರಾಗಿದ್ದು, ಪುರುಷನ ಅಧಿಕಾರ ಮತ್ತು ಧೋರಣೆಗಳನ್ನು ಮೌಲೀಕರಣಗೊಳಿಸುವಲ್ಲಿ ಪುರುಷಪರವಾಗಿರುತ್ತದೆ. ಇಂತಹ ಪರಿಸರದಲ್ಲಿ ಸಾಂಸ್ಕೃತಿಕ ಮೌಲ್ಯಗಳ ರಚಕರು ಮತ್ತು ನಿಯಂತ್ರಕರು ಪುರುಷರಾಗಿರುವುದು ಹಾಗೂ ಗಾದೆಗಳ ಪ್ರಧಾನ ಉದ್ದೇಶವೇ ಇಂತಹ ಸಾಮಾಜಿಕ ಸಾಂಸ್ಕೃತಿಕ ಮೌಲ್ಯಗಳನ್ನು ನಿರಂತರಗೊಳಿಸುವುದು ಆಗಿರುವಲ್ಲಿ ಮಹಿಳೆಯರು ಗಾದೆ ಮಾತುಗಳನ್ನು ಬಳಸಿದರೂ ಅವರು ‘ಪುರುಷ ದನಿ’ಯಲ್ಲೇ ಆಡುತ್ತಾರೆ ಎನ್ನುವ ಸೂಕ್ಷ್ಮವನ್ನು ತಿಳಿಯಬೇಕಾಗಿದೆ.